“Реал” клубының ішінде жаңа ішкі драма туындап жатыр – бұл жолы алаңнан тыс жерде. Команданың басты ойыншыларының бірі Винисиус Жуниор қиын жағдайға тап болды: ол Мадридте қалғысы келеді, алайда Килиан Мбаппеге қарағанда өзін өзгеше жағдайда сезінеді, деп хабарлайды Tenbildop.kz сайты.
Don Balon басылымының мәліметінше, бразилиялық ойыншы келісімшартты ұзарту жөніндегі келіссөздерде өз талабын нақты білдірген: ол француз футболшысымен тең жалақы алғысы келеді – жылына шамамен 15 миллион еуро және келісімшартқа қол қойғаны үшін бонус ретінде 30 миллион еуро (бес жылға бөлініп беріледі).
Винисиус бірнеше рет өзінің командаға қосқан үлесі, ойынының деңгейі және клубқа деген адалдығы қаржылай мойындауға лайық екенін атап өткен.
Алайда клуб басшылығы, нақтырақ айтқанда Флорентино Перес, бұл мәселеге басқаша қарайды. Жаңа жұлдыздардың келуіне және ірі қаржылық шығындарға байланысты “Реал” жалақы иерархиясын сақтап қалуға тырысып жатыр. Винисиуске ұсынылған нұсқа – тұрақты жалақыны сәл ғана көтеріп, қалғанын оның жеке бейнесін (имиджін) коммерциялық мақсатта пайдалану құқығын кеңейту арқылы өтеу. Бұл жүйе Мбаппеге де қолданылып отыр.
Яғни, Винисиус жарнама келісімшарттары арқылы көбірек табыс таба алады, бірақ бұл табыс клуб тарапынан тікелей төленбейді.
Алайда Винисиус үшін бұл жеткіліксіз болып көрінеді. Ол клуб ішіндегі өз орнын жоғалтып жатқанын сезеді – тек алаңда ғана емес, басқа да салаларда. Бұрын ол әрдайым назарда жүрсе, қазір бірінші кезекке Мбаппе шықты – жарнамалық баннерлерде де, жалақы тізімдерінде де.
Бұл жасырын қақтығыс енді эмоция шеңберінен шығып, мәртебе үшін күреске айналды.
Айта кетейік, бұған дейін Мбаппе “Реалдың” жаңа бас бапкері Хаби Алонсо жайлы ашық мәлімдеме жасап, оның тағайындалуына қатысты өз пікірін білдірген болатын.
Винисиустың “Реалмен” қазіргі келісімшарты 2027 жылдың жазында аяқталады. Transfermarkt порталы футболшының нарықтық құнын 200 миллион еуро деп бағалап отыр.