Петропавлдың «Qyzyljar» футбол клубы кәсіби спорт ұйымдарының басқару тиімділігін арттыру жөніндегі Мемлекет басшысының тапсырмасы аясында жекеменшік басқару моделіне көшті, деп хабарлайды tenbildop.kz.
Солтүстік Қазақстан командасының жаңа инвесторы — белгілі кәсіпкер, энергетика саласындағы ірі бизнесмен Сергей Кан болды.
Сергей Кан — «Қазақ мұнай және газ институты» акционерлік қоғамының жалғыз акционері және директорлар кеңесінің мүшесі. Сондай-ақ ол Павлодар, Ақмола және Солтүстік Қазақстан облыстарында жұмыс істейтін «ЦАЭК» және «ЦАТЭК» энергетикалық компанияларының тең иесі.
Бұдан бөлек, кәсіпкер Александр Клебанов және оның ұлы Яковпен бірге «Circle Maritime Invest» кеме қатынасы компаниясын басқарады, сонымен қатар Rixos Almaty қонақ үйінде және «Теңіз Star» компаниясында үлесі бар.
Кан «Circle Maritime Invest» директорлар кеңесінің мүшесі, Қазақстан корейлері қауымдастығының қамқоршылар кеңесіне кіреді және IQanat білім беру бастамасын қолдайды.
Жаңа инвесторға клубтың барлық спорттық құқықтары — «Qyzyljar» бренді, Премьер-лигада ойнау лицензиясы, қолданыстағы келісімшарттар мен материалдық-техникалық база берілді. Бұл өзгеріс заманауи менеджмент тәсілдерін енгізуге, қаржылық тұрақтылықты арттыруға және ұзақмерзімді дамудың негізін қалауға мүмкіндік береді.
Келісімге сәйкес, Сергей Кан жыл сайын клубты дамытуға кемінде 1 миллиард теңге инвестиция салмақ. Ал мемлекеттік қаржыландыру көлемі кезең-кезеңімен азайып, үш жыл ішінде толық тоқтатылады. Мұндай тәсіл нәтижелердің тұрақтылығын сақтап, клубтың тәуелсіз инфрақұрылымын қалыптастыруға жол ашады.
Солтүстік Қазақстан облысының әкімдігімен бірлесіп, «Қарасай» стадионын клубтың сенімгерлік басқаруына беру мәселесі қарастырылуда. Болашақта стадион, жаттығу алаңдары, футбол академиясы мен жас ойыншыларды даярлау орталығы біртұтас даму экожүйесіне біріктіріледі.
Жоба тек негізгі команданы қолдауға емес, сонымен қатар өңірдегі балалар мен жастардың спорттық әлеуетін арттыруға бағытталған. «Qyzyljar» академиясы заманауи әдістемелер бойынша жұмыс істеп, жас спортшылардың жеке және кәсіби дамуына назар аударады.
Айрықша көңіл жергілікті тәрбиеленушілерге бөлінеді. Академия Солтүстік Қазақстан облысының талантты балаларын іріктеу орталығына айналады. Жас ойыншылар жастар және резервтік құрамаларда тәжірибе жинақтап, үздіктері Премьер-лигадағы негізгі команда сапына қосылмақ. Бұл — балалар спортынан ұлттық құрамаларға дейінгі нағыз әлеуметтік лифт болады.