Мадридтік «Реал» франциялық қорғаушы Ферлан Мендиді сатуды жоспарлауда, деп хабарлайды Tenbildop.kz сайты, DefensaCentral сайтына сілтеме жасай отырып.
Ақпарат көзіне сәйкес, бұл шешім Хаби Алонсоның бас бапкер қызметіне келуімен байланысты. Менди оның ойын жүйесіне сай келмейді — жаңа бапкер шапшаң, шабуылға белсенді қосылатын қаптал қорғаушыларды қалайды, ал бапкерлік штабтың пікірінше, француз футболшысы бұл талаптарға толық сәйкес емес.
Қосымша фактор ретінде ойыншының физикалық жағдайының тұрақсыздығы аталады. Менди жиі жарақат алады, қазіргі кезде ол тік бұлшықеттің проксималды сіңірінің үзілуіне байланысты қыркүйекке дейін қатардан шығып қалған. Бұл оның маусым алдындағы дайындықты және команда үшін басты мақсаттардың бірі саналатын клубтар арасындағы әлем чемпионатын өткізіп алатынын білдіреді. Бұған дейін Менди Карло Анчелотти үшін маңызды ойыншылардың бірі болған, бірақ жаңа бапкер келген соң ол жазда клубтан кетуі мүмкін. «Реал» басшылығы оның трансферінен едәуір қаржы түсіруге үміттеніп отыр.
Еске сала кетейік, 2019 жылы «Реал» Мендиді «Лионнан» 48 миллион еуроға сатып алған болатын. Биылғы Ла Лига маусымында ол 14 матч өткізіп, бір нәтижелі пас берген.